Sampurasun.
Alhamdulillaahi
robbil ‘aalamiin, was-sholaatu wassalaamu ‘alaa asyrofil anbiyaa-i wal
mursaliin, sayyidina muhammadin, wa’ala alihi wa’ashabihi aj’ma’iin, Amma
ba’du.
Langkung
tipayun hayu urang panjatkeun puji sinareng syukur kahadirat Allah SWT. dina
dinten ieu urang tiasa ngariung patepung lawung, paamprok jonghok dina kaayaan
sehat walafiat. Salawat miwah salam mugi tetep ngocor ka jungjunan urang sadaya
Nabi Muhammad SAW., ka kaluwargina, kapara sohabatna, sareng teu hilap ka
sadaya umatna. Aamiin aamiin ya Robbal ‘Aalamiin.
Girang
pangajen anu luhung ku elmu panemu, jembar ku karsa, karya, katut pangalaman nu
ku sim kuring dipihormat. Teu hilap oge sadaya rerencangan anu sami hadir di
ieu tempat, anu ku sim kuring dipiheman.
Kadang
wargi anu mulya. Dina raraga pasanggiri biantara Basa Sunda tingkat Kacamatan
Kramatmulya sim kuring bade ngadugikeun biantara anu judulna nyaeta
”Perkembangan Basa Sunda di Kabupaten Kuningan”.
Hadirin
nu dipihormat. Basa Sunda saleresna mah sanes kanggo para nonoman wungkul, Basa
Sunda salaku basa indung bakal leuwih nyerep ka diri nonoman lamun geus
dibiasakeun diwanohkeun ti bubudak. Mikacinta Basa Sunda, hartosna urang
parantos ngalaksanakeun amanah anu aya dina Perda Kabupaten Kuningan Nomer 6
Taun 2006. Amanah eta tujuana nyaeta sangkan bahasa daerah teh teu musnah
kulantaran tara digunakeun ku masyarakatna. Kulantaran kitu pasualan utama anu
kedah kawaler dina ieu biantara teh, nyaeta kumaha sangkan generasi muda
mikacinta kana Basa Sunda.
Hadirin
nu dipihormat. Waleranana, sajabi ti rupi-rupi hal anu disebatan tadi, rumus
anu utama generasi muda ulah ngaraos isin atanapi gengsi ngagunakeun Basa
Sunda. Konci utamina nonoman kedah ngagunaken Basa Sunda di lingkungan
kulawarga boh di jalan pasampangan, salami urang nu cacarita papada ngarti kana
Basa Sunda. Ulah nepikeun ka jati kasilih ku junti, mupusti basa asing bari teu
malire basa urang sorangan.
Hadirin
nu dipihormat. Eta mah sakadar cita-cita simkuring. Da ahirna mah diwangsulkeun
deui ka nonoman nyalira. Cindekna mah urang kedah peheuyeuk-heuyeuk leungeun
dina ngamumule, ngaraksa, sareng ngariksa basa Sunda. Sakitu nu kapihatur,
hapunten sanes bade mamatahan ngojay ka meri. Ieu mah mungguhing kajurung ku
laku sim kuring salaku nonoman Sunda. Sasieureun-sabeunyeureun bae mah ngiring
nyumbang saran.
Saninten
buah saninten
Dibawa
kaparapatan
Hapunten
abdi hapunten
Bilih aya
kalepatan
Wabillahi taufiq wal
hidayah, wa ridho wal inayah. Wassalamu’alaikum Warahmatullahi Wabarakatuh.
Komentar
Posting Komentar